По повод Меѓународниот ден на глувите и наглуви лица работна средба на министерката Ташевска-Ременски со Здружението на глуви и наглуви лица на Град Скопје
По повод Меѓународниот ден на глувите и наглуви лица којшто секоја година се одбележува во последната недела од месец септември, денеска (28.9.2016 година) министерот за труд и социјална политика д-р Фросина Ташевска-Ременски оствари работна средба со Здружението на глуви и наглуви лица на Град Скопје, кое е членка на Националниот Сојуз на глуви и наглуви на Македонија.
На работната средба се зборуваше за активностите на Здружението на општинско ниво. Од здружението се пожалија на нетранспарентната соработка со Националниот сојуз на глуви и наглуви лица, неговото раководство и начинот на којшто не им се овозможува пристап до права како членови на Националниот Сојуз.
Работењето на Националниот сојуз на глуви и наглуви на Македонија е регулирано со Законот за инвалидски организации и Законот за употреба на знаковниот јазик во коишто јасно и недвосмислено е утврдена соработката со Министерството за труд и социјална политика.
Со оглед на тоа што Министерството за труд и социјална политика е задолжено да врши надзор на спроведувањето на овие закони, тоа е обврзано да ја следи и работата на Сојузот при спроведувањето на активностите во делот на обезбедување секаква можна помош за лицата со оштетен слух претставени преку нивните здруженија.
Со цел подобрување на комуникацијата и работата на Здружението на глуви и наглуви лица и нивно достојно претставување, се истакна заложбата Министерството за труд и социјална политика да ги отстрани сите прашања кои се јавуваа како проблем во комуникацијата.