Меѓународниот ден на лица со инвалидност повод за посета на ЈУ Заводот за рехабилитација на деца и младинци во Топанско Поле

По повод одбележувањето на 3 декември, Меѓународниот ден на лица со инвалидност министерот за труд и социјална политика, д-р Фросина Ташевска-Ременски го посети ЈУ Заводот за рехабилитација на деца и младинци во Топанско Поле со цел да се запознае со условите во кои опстојува оваа институција.     

Таа на лице место можеше да се увери во лошите услови во кои работи Заводот за рехабилитација на деца и младинци во Топанско Поле со што се потврдија и поплаките од граѓаните кои имаат блиските сместени во овој Завод.

Условите се далеку од она што треба да им обезбеди на корисниците една држава која себе си се декларира за социјална држава. 

Министерката Ташевска-Ременски по посетата на Заводот рече дека се утврдило дека дел од корисниците имаат потреба од лекарска помош, а дел и воопшто не би требало да бидат сместени во Заводот. 

,,Направена погрешна проценка од страна на стручните служби и дел од корисниците воопшто не би требало да бидат сместени во Заводот, а други, пак имаат потреба од лекарска помош”, рече министерката д-р Фросина Ташевска-Ременски во изјавата по ненајавената посета на ЈУ Заводот за рехабилитација на деца и младинци во Топанско Поле.