14.10.2024

Takimi Limani - Çeku nga Forumi për Rininë, Berlin: Me përpjekje të përbashkëta, angazhimet për një të nesërme më të mirë për të rinjtë i shndërrojmë në veprime

Ministri i Politikës Sociale, Demografisë dhe Rinisë, Fatmir Limani, gjatë vizitës së tij të punës në Berlin për shkak të pjesëmarrjes në Forumin Rinor, në kuadër të Procesit të Berlinit, shfrytëzoi rastin për takime të drejtpërdrejta me ministrat e vendeve të Ballkanit Perëndimor.

Në takimin me ministrin e Kulturës, Rinisë dhe Sportit të Kosovës, Hajrulla Çeku, kanë diskutuar për shumë fusha të përbashkëta që janë pjesë e dy ministrive.

Bashkëbiseduesit diskutuan për rëndësinë e hyrjes së Ballkanit Perëndimor në Bashkimin Evropian, duke theksuar se barazia e të gjitha vendeve duhet të jetë një parim që do të respektohet, pa kushte.

Ministrat folën edhe për thellimin e bashkëpunimit në fushën e rinisë, shkëmbimin e përvojave pozitive me theksin se angazhimet e përbashkëta për një të nesërme më të mirë të të rinjve duhet të shndërrohen në veprime, në mënyrë që përfitimet të bëhen të njohura dhe të dukshme.